Ներկայացվող պահանջները

Շրջակա միջավայրի վրա ազդեցության գնահատմումն ու փորձաքննությունն անհրաժեշտ է իրականացնել մի շարք գործունեության տեսակների դեպքում, որոնք դասակարգվում են երկու` Ա և Բ կատեգորիաների՝ ըստ շրջակա միջավայրի վրա նվազող ազդեցության աստիճանի։

Պահանջվող փաստաթղթերը

Շրջակա միջավայրի վրա ազդեցության փորձաքննական եզրակացություն ստանալու համար անհրաժեշտ է ներկայացնել՝

• շրջակա միջավայրի վրա ազդեցության գնահատման (ՇՄԱԳ) հաշվետվություն,

• նախատեսվող գործունեության դեպքում՝ նախագծային փաստաթուղթը,

• տեղական ինքնակառավարման մարմնի կողմից տրված նախնական համաձայնության որոշումը (եթե սահմանված ժամկետում համայնքի ավագանու կողմից որոշում չի կայացվում՝ նախաձեռնողը փաստաթղթերի փաթեթը կարող է փորձաքննության ներկայացնել առանց համաձայնության, ինչի դեպքում հարցում է կատարվում համապատասխան համայնքի ղեկավարին),

• տեղական ինքնակառավարման մարմնի կողմից իրականացված հանրային լսումների ընթացքում կազմված փաստաթղթերը (ծանուցման հրապարակման պատճենը, լուսանկարները կամ տեսաձայնագրությունները, առկայության դեպքում՝ առաջարկությունները և կարծիքները, ինչպես նաև հանրային լսումների արձանագրությունները)։
  
  

Եզրակացության չտրամադրման հիմքերը

Եզրակացությունը կարող է չտրամադրվել, եթե բաց են թողնվել սահմանված ժամկետները։ 

Բացասական եզրակացություն կարող է տրամադրվել, եթե՝ 

• լրամշակման վերադարձված փաթեթը նախաձեռնողի կողմից չլրամշակված ներկայացնելու դեպքում 10 աշխատանքային օրվա ընթացքում տրվում է բացասական եզրակացություն,

• 30 աշխատանքային օրվա ընթացքում նախաձեռնողի կողմից լրամշակված փաթեթը չներկայացվելու դեպքում փաթեթն օրենքի ուժով համարվում է բացասական եզրակացություն ստացած:
  
  

Վճարման չափը և կարգը

Շրջակա միջավայրի վրա ազդեցության փորձաքննական եզրակացություն ստանալու համար անհրաժեշտ է վճարել 300,000-1,000,000 դրամ՝ կախված գործունեության տեսակից։ Վճարումն անհրաժեշտ է կատարել բանկային փոխանցմամբ 900005000196 հաշվեհամարին։

Տրամադրման ժամկետը և կարգը

Ա կատեգորիայի նախատեսվող գործունեության ՇՄԱԳ հաշվետվության համար  եզրակացությունը տրամադրվում է 80 աշխատանքային օրվա ընթացքում, իսկ Բ կատեգորիայի՝ նախատեսվող գործունեության համար 40 աշխատանքային օրվա ընթացքում։

Փորձաքննության գործընթացների լիարժեքությունն ապահովելու համար լրացուցիչ աշխատանք կատարելու անհրաժեշտության դեպքում փորձաքննական գործընթացի ժամկետը կարող է երկարաձգվել մինչև 30 աշխատանքային օրով։

Հղում օրենսդրությանը

• «Շրջակա միջավայրի վրա ազդեցության գնահատման և փորձաքննության մասին» ՀՀ օրենք

• Կառավարության 2014 թվականի նոյեմբերի 19-ի N 1325-Ն որոշում

Իրավական ակտերը հնարավոր է գտնել arlis.am-ում։