Պաշտոնական փաստաթղթերն ապոստիլով վավերացվում են ՀՀ արդարադատության նախարարության կողմից, բացառությամբ քրեական հետապնդման, հետախուզման և դատվածության բացակայության մասին տեղեկանքների, որոնք ապոստիլով վավերացվում են ՀՀ արտաքին գործերի նախարարության կողմից։

Անհրաժեշտ է այցելել ՀՀ արդարադատության նախարարություն (հասցե՝ Երևան 0010, Վազգեն Սարգսյան 3/8)` ներկայացնելով պահանջվող փաստաթղթերը։

Անհրաժեշտ է տեղում վերցնել հերթի կտրոն՝

• սարքի էկրանին ընտրել «Ֆիզիկական անձ» կամ «Իրավաբանական անձ» տարբերակներից մեկը,
• սեղմել «Հանձնել փաստաթուղթ» տարբերակը,
• իսկ փաստաթուղթը ստանալու համար սեղմել սարքի էկրանի «Ստանալ փաստաթուղթ» կոճակը։

Պահանջվող փաստաթղթերը

Ապոստիլով վավերացում կատարելու համար անհրաժեշտ է անձամբ կամ լիազորված անձի միջոցով Արդարադատության նախարարություն ներկայացնել հետևյալ փաստաթղթերը․

• դիմողի անձը հաստատող փաստաթուղթը,
• ապոստիլով վավերացման ենթակա պաշտոնական փաստաթուղթը,
• պետական տուրքի վճարման անդորրագիրը:

Վճարման չափը և կարգը

Փաստաթղթերի ապոստիլով վավարացման համար անհրաժեշտ է վճարել 7,000 դրամ։ Վճարումը հնարավոր է կատարել հետևյալ եղանակներից մեկով․

• առցանց (առցանց վճարելու դեպքում անհրաժեշտ է տպել վճարման անդորրագիրը և ներկայացնել թղթային տարբերակով),
• տեղում՝ POS տերմինալի միջոցով,
• բանկային փոխանցում կատարելով ՀՀ պետական բյուջեի 900005163523 հաշվեհամարին։ «Նպատակ» դաշտում անհրաժեշտ է մուտքագրել «Փաստաթղթերի վրա ապոստիլ դնելու համար» (եթե բանկային հավելվածում չի ստացվում փոխանցում կատարել այս հաշվեհամարին, ապա խնդրում ենք ընտրել «Փոխանցում պետական բյուջե» տարբերակը)։

Ծառայությունից կարելի է օգտվել նաև արագացված ընթացակարգով, որի համար պահանջվող պետական տուրքի չափը 10.000 դրամ է։

Տրամադրման ժամկետը և կարգը

Ապոստիլով հաստատված փաստաթուղթը տրամադրվում է 2 աշխատանքային օրվա ընթացքում։ Այն ստանալու համար անհրաժեշտ է այցելել Արդարադատության նախարարություն (հասցե՝ Երևան 0010, Վազգեն Սարգսյան 3/8)՝ դիմումը ներկայացնելու հաջորդ օրը ժամը 16։00-ից 17։00-ն։

Ապոստիլով վավերացման ժամկետը երբեմն կարող է երկարաձգվել՝ պայմանավորված փաստաթղթի իսկությունը ճշտելով։

Ծառայությունից արագացված ընթացակարգով օգտվելու դեպքում՝ փաստաթուղթը պատրաստ է լինում 1 աշխատանքային օրվա ընթացքում։

Էլեկտրոնային ապոստիլի իսկությունը հնարավոր է ստուգել՝ այցելելով www.e-verify.am և մուտքագրելով ապոստիլի վրա նշված հսկիչ համարը կամ արագ արձագանքման ծածկագիրը (QR կոդը):

Էլեկտրոնային ապոստիլի ձևաթղթի ստորին հատվածում նշվում է ապոստիլով վավերացվող պաշտոնական փաստաթղթի էջերի ամբողջական քանակը: Ծավալուն պաշտոնական փաստաթղթերի իսկությունը ստուգելիս արտացոլվում է փաստաթղթի մինչև 6 էջը:

Հղում օրենսդրությանը

• «Հայաստանի Հանրապետության պաշտոնական փաստաթղթերը ապոստիլով վավերացնելու մասին» ՀՀ օրենք
• ՀՀ արդարադատության նախարարի 2021 թվականի հոկտեմբերի 5-ի N 483-Ն և ՀՀ արտաքին գործերի նախարարի 2021 թվականի հոկտեմբերի 8-ի N 2056-Ն համատեղ հրաման

Իրավական ակտերը հնարավոր է գտնել arlis.am-ում։